ŞRİFTİN ÖLÇÜSÜ
A
A
A
ŞRİFTİN NÖVÜ
Poppins
Serif
RƏNGİN TƏSVİRİ
“Tikinti materialları, məmulatları və konstruksiyaları”nın standartlaşdırılması üzrə Texniki Komitənin (AZSTAND/TK 10) növbəti iclası keçirilib
4 Aprel, 2025
Azərbaycan Respublikası Fövqəladə Hallar Nazirliyi Tikintidə Təhlükəsizliyə Nəzarət Dövlət Agentliyinin S.Ə.Dadaşov adına Elmi-Tədqiqat və Layihə-Konstruktor İnşaat Materialları İnstitutunun bazasında yaradılan “Tikinti materialları, məmulatları və konstruksiyaları”nın standartlaşdırılması üzrə Texniki Komitənin (AZSTAND/TK 10) onlayn formatda növbəti iclası keçirilib.
İclasda Azərbaycan Standartlaşdırma İnstitutunun (AZSTAND) nümayəndələri ilə yanaşı, Azərbaycan Respublikası Fövqəladə Hallar Nazirliyi Tikintidə Təhlükəsizliyə Nəzarət Dövlət Agentliyinin S.Ə.Dadaşov adına Elmi-Tədqiqat və Layihə-Konstruktor İnşaat Materialları İnstitutu, Azərbaycan Respublikası Energetika Nazirliyi, Azərbaycan Memarlıq və İnşaat Universiteti, “Norm” ASC, “Penoplex Prikavkazye” MMC, “Fortis Group” MMC, “Kartaş Kimya” MMC və “BETONİST” MMC-nin nümayəndələri iştirak ediblər.
İclas zamanı Avropa və dövlətlərarası standartlar əsasında hazırlanmış dam örtüyü və divarların üzlənməsi üçün beton plitələrə, daş hörgünün köməkçi elementlərinə, keramik plitələr üçün yapışdırıcılara, beton yol örtüklərinə, yığma dəmir-beton məhsullarına, inşaat konstruksiyalarının və əsaslarının etibarlılığına dair tələbləri müəyyənləşdirən dövlət standartlarının layihələri müzakirə edilib, eləcə də dövri yoxlanılması aparılacaq standartlara baxılıb.
Bundan əlavə, Azərbaycan Respublikası Prezidentinin 23 yanvar 2023-cü il tarixli 3721 nömrəli Sərəncamı ilə təsdiq edilən “Milli standartlaşdırma sisteminin beynəlxalq tələblərə uyğunlaşdırılmasına dair 2023-2025-ci illər üçün Dövlət Proqramı”nın Tədbirlər Planından irəli gələn tapşırıqların icra vəziyyəti, xüsusilə də “Tikinti materiallarının, məmulat və konstruksiyalarının təhlükəsizliyi haqqında milli texniki reqlament” layihəsinin hazırlanması istiqamətində görülən işlər barədə məlumat verilib. Texniki Komitənin cari fəaliyyəti, qarşıda duran vəzifələr barədə fikir mübadiləsi aparılıb, üzvlərin rəy və təklifləri dinlənilib.
4 Aprel, 2025
